A los güenus días, Diana. Mu güenas a toa Estremaúra!
Si por pogressu entendemus el tenel que cogel tolo que vieni d'ahuera, copiá-lu i hazel que soponga alo que avía paquí enantis, mal mos vendrán dás.
La globalización allegó pa queal-si entri nusotrus conas sus cosas güenas peru tamién conos sus rasgus d´unihormidá i d´emponimientu de tó aquellu que tié la huerça del dineru pa destendel-si por tol mundu i que mos hazin sel lo mesmitu enos Mairilis i en Lisboa, en Roma i en París, i en Tokio i Nueva York. I sigún paeci, estu tié que sel bien vistu. O que dil ala contra d'estu no es lo corretu.
Dendi Estremaúra no dimus a mual el mundu. Essu ya lo sabemus de contau. No semus tan emportanciosus. Peru alo que mos negamus dendi OSCEC, es a desaculal-mus dela nuestra coltura, ala nuestra horma de sel i de vivil o la nuestra horma de sentil el mundu i la nuestra tierra, o a la horma de cuentá-lu.
Velaí, en estremeñu, a fala i portugués arrayanu.
Porque protegel no es imponel. I si imponel es afial/cudial o condural, bienllegau sea tamién. Como se impusu el cudiau delas güetris nel Parqui Nacional de Monfragüi. O lo mesmitu que se declaró la Cidá Menumental de Caçris comu Patrimoniu dela Umaniá pa condural la parti antiga. Comu la Méria romana, comu la Alcaçaba de Badajó, comu la Siberia, Reselva dela Biosfera o comu Gualupi cona puebra i el su monesteriu. Sitius enos que s´emponi l´afiamientu pa cudiá-lus i protegé-lus.
Lo mesmu que á hechu esta semana el Conceju de Benquerencia, ena Comarca de Montanchi. Un puebru que bracea contri el despuebramientu. I que lo mesmu que protegi la su ermita, la su hesa, las sus tradicionis, quieri tamién da-li proteción ala lengua que dendi siempri án palrau los sus paisanus: el estremeñu.